Здавалка
Главная | Обратная связь

Эрзянь Инешкипазонтень.



Эрюш Вежай

ЭРЗЯ – ТЕ МАЗЫЙ РАСЬКЕ, А СОДАВИКС РАСЬКЕ…

ВАЛМОРОТ

Эрзя

Эрзя! Эрзянь! Эрзянь вий!
Эрзянь моро, эрзянь ки…
Эрзянь вайгель, эрзянь вал,
Эрзянь валдо, эрзянь нал…
Эрзянь кудо, эрзянь лей,
Эрзянь эрьке ды килей…
Эрзянь пакся, эрзянь каль,
Эрзянь кудо, эрзянь парь…
Эрьзянь Стёпан, эрзянь кой,
Эрзянь раське, эрзянь пой,
Эрзянь тумо ды медь-ой…
Эрзянь менель, эрзянь кель,
Эрзянь ойме, эрзянь сэрь!
ЭРЗЯ - мордватненень килькш,
ЭРЗЯТНЕНЕНЬ - ойме нилькс!

***

Мон а карман «мордва»кс!


Мон а карман, а карман «мордвакс»,
Кадык тонгить удемзэм те нулготькс валонть,
Мон куломазом карман - Эрзя!
Калмстомгак карман эрзякс рангомо…

***

Оляксчи

Ансяк эсь мельсэ эрямось, эсь коесь, вансты ойметь.

Ансяк эсь кельсэ кортамось ломаннень невти раськеть.

Кадык вельксканок пувсекшныть ды эшксить кежей вармат,

Ансяк сынст каршо молемстэть виеть онкстат.

 

Оляксчи, ванстык Эрзянь Мастором.

Видексчи, тонеть палы штатолом.

Эрямо, эрзятненень лавсекс ульть.

Чипайнем, Мастор велькска уйть!

Инешки, ванстык Эрзянь Мастором,

Эрямо! Эрзянь раське – ульть!

 

Таго виеми, одс вельми вечкевикс эрзянь раськем,

Таго карми Мастор лангсо гайгеме эрзянь келем.

Локсеекс ливтни ды налки менельсэ эрзянь оймем,

Эрзянь Мастором ванстан псистэ чавиця седейсэм.

 

Оляксчи, ванстык Эрзянь Мастором.

Видексчи, тонеть палы штатолом.

Эрямо, эрзятненень лавсекс ульть.

Чипайнем, Мастор велькска уйть.

Инешки, ванстык Эрзянь Мастором,

Оляксчи, тонеть палы штатолом.

Видексчи, эрзятненень нежекс ульть.

Эрямо! Эрзянь раське – ульть!

 

Инешки, ванстык Эрзянь Мастором....

 

***

2014 ие.

 

Ульть превей

 

Эрзянь меленть сэрезэ – сэрейде сэрей,

Эрзянь валонть питнезэ – питнеде питней,

Се сэресь теть онкстави,

Те питнесь теть содави,

Ансяк ульть превей.

 

Эрзянь моронть валонзо – превейде превейть,

Эрзянь коенть виензэ – виевде виевть,

Се морось теть морави,

Коеськак топавтови,

Ансяк ульть превей.

 

Эрзянь аванть мазызэ – чевтемти седей,

Эрзянь атянть превензэ – домкат ды келейть,

Те авась теть вечкеви,

Се атясь чарькодеви,

Ансяк ульть превей.

 

Эрзянь ёвксось ёвтневи – кунсолост пилеть,

Эрзянь раськесь сэреди - неевельть сельметь,

Се ёвксось кунсолови,

Раськенек – вельмевтеви,

Эрзя, ульть превей!

 

***

2014 ие.

 

Эрзянь Инешкипазонтень.

( Сюконямо-Вешема)

 

Сюконян Тонеть, Нишкепаз,

Тон казнекс максык Эрямонть,

Сюконян Тонеть, Нишкепаз,

Тон седейс совавтык Кецямонть,

Сюконян Тонеть, Нишкепаз,

Тон пувтык вечкемань пицеманть,

Сюконян Тонеть, Нишкепаз,

Тон казик тенек Вечкеманть.

 

Тон, ансяк Тон, Нишкепаз,

Максык тенек Эрзянь келенть,

Тон, ансяк Тон, Нишкепаз,

Путык тенек Эрзя лементь,

Тон, эрзянь Инешкипаз,

Ванстат монь Эрзянь Масторонть,

Тон, Эрзянь теиця Паз,

Оймес путык эрзянь моронть.

 

Тоньтеметь раськенек а эри,

Тоньтеметь виренек а сэрейть,

Тоньтеметь ловось а солы,

Тоньтеметь а шачтнить нить-полат.

 

Сюконян Тонеть, Нишкепаз,

Тон эйсэм марят, кунсолат.

Мон эрзякс мартот кортан,

Тон эрзякс эйсэм чарькодят.

 

Нишкепаз… Тонеть сюконян,

Инешки… Ванстыть эрзятнень…

 

***

 

Велявт Эрзянь Масторов!

(Алтави Йовлань Олонень)

 

Кува тон аволить яка,

Кува тон аволить пака,

Тон велявт кудов, Эрзянь Масторов,

Лецтик эйкакшпингеть одов.

 

Вадовось менельга уи,

Ванны-теи, вирев туи,

Пизэзэ тосо, левксэнзэ тосо,

Тетять-авать кудось косо?

 

Тосо нувсить варма зэхельть,

Ливтнить ашо шождыне пельть,

Тосо ломантне одт, вишкинеть кудот,

Гайгить тосо эрзянь морот.

 

Вант, тонь кудо юртот каладсь,

Велень калмазыресь порксазь,

Домка лисьмась коськсь. Колызь, эли сонсь?

Содан, теньсэ чуман мон монсь…

 

Таго вирстэ вадовось сась,

Велькскам ливтни, сулей каясь.

Середи оймем, лазы седеем,

Мезес мон путыя вием?

 

Кува тон аволить яка,

Кува тон аволить пака,

Одс велявт кудов, Эрзянь Масторов,

Эсь кудозот совак одов.

 

***

 

Лемень кундамо

Вирьсэнек якстере сундерькст,
Чизэ качамос валги…
Кудов эзь велявто цёрась,
Авась мельганзо ранги.
Эрзят, покштянк илинк стувто,
Лемест кирдеде мельсэнк.
Эйкакшонк ды ласькенк туртов
Морот морседе вейсэ.

Мороюткось:

Кундака, лемест эрзянь цёратнень,
Лецтнека, мезес путсть сынь покш вий…
Ёвтнека, мезень кис модас прасть сынь
Ине тевест а ёми, зярдояк!

Прядови кезэрень морось,
Торамань меельце гайтть…
Паксятнень витнинзе Шказо,
Моразенть мелезэть сайть.
Умок минь мольдяно вейсэ,
Толдо а пельтяно минь,
Вант, Эрзямасонь Олёна,
Толсто мартонок корты.

Мороюткось:

Кундака, лемест эрзянь цёратнень,
Лецтнека, мезес путсть сынь покш вий…
Ёвтнека, мезень кис модас прасть сынь
Ине тевест а ёми, зярдояк!

Раськенек ине виезэ
А тертяви кинеяк.
Эрзянь Масторонть лемензэ
Ванстыть эрзятне нейгак.
Эрзянь Масторо, тон эряк!
Нежекс аштят тенек тон.
А максстано сявордомот,
Тон эрзятнень – кудо.

 

***

 

Тон апак ёвтне ёвкс…

Тон – апак сергедть моро,
Тон – апак ёвтне ёвкс,
Тон – модынесь коморсом,
Тон – седеень киторкс…

Леметь – эжди седеем,
Морот – витить мелем…
Вечктян, Эрзянь Мастором!
Вечктян, эрзянь келем!

Вечктядызь ансяк эрзят,
Вансттадызь – ансяк сынь,
Тон превсэм, мельсэм эрят,
Секс эрзякс мон касынь…

Кода леметь а кекшить,
Кода а тапить тонь,
Мон теть Эрямо вешан,
Пшкалян кисэть Пазнэнь.

Тон – эрянь гайтев моро…
Тон – эрзянь мазый ёвкс…
Эряк, Эрзянь Мастором!
Ульть-ульть, седей киторкс!

 

***

 







©2015 arhivinfo.ru Все права принадлежат авторам размещенных материалов.