 |
|
Бабинетне эрзякс кортыть
Косто марямс эрзянь келенть?...
Эрзянь велев ардодо,
Ало пева, Вере пева
Ютадо… Кунсолодо…
Бабинетне эрзякс кортыть
Вальма ало озадо…
Вейкесь обмоценть кавани
Прякадо ды позадо…
Тона суски, поза коршты,
Памшты-теи, киведи:
-Кода теить? Мезе путыть?-
Шабранть кевкстни ялгазо…
- Кода паневсть истят тантейть?
Келеськак ва нилеви!-
- Исяк чокшнэ чапакс путынь,
Валскес парсте сыргазо…
Каинь комоляведь, оргат,
Ичинь кедьсэ, скалкасо…
Тапинь алнэть, каинь ойне,
Мерькинь ашо модамарть,
Теинь весе авань койнекс,
Тензэ чансть Паз максозо…-
Бабинетне эрзякс кортыть
Вальма ало озадо,
Кортыть мазый эрзянь кельсэ...
- Састыне… Кунсолодо…
***
Эрзянь тейтерь
Эрямось моли, теке чуди лейне,
Пиземеть валыть, палыть маней чить,
Сельмень икелем тон тундонь килейнекс
Мастор лангонтень казят мазычить.
Тон - эрзянь тейтерь, тетерьксчинь иеват,
Велева ютат - каят сиянь жойть,
Панарот-руцят стазь-викшнезь котова,
Эрзянь оршамосот тон ванстат эрзянь койть.
Пулайнеть кутмори чова карксамот,
Пря пангот сэрей менельга кандат...
Кинень алтат кирви вечкемань самонть?
Кинень учонь уцяскакс тееват?
Тон эрзянь тейтерь, луга-паксянь цеця,
Мазычинь пусмо, маней-валдо мель!
Седеем токны, кода тонь мон нетян,
Истя виевстэ... Ва а сезевель!
***
Яла эйсэть учан…
(Броди Яношонь, мадьяр раськень морыцянть, моронзо коряс)
Чопода менелесь, опаня весь,
Кудосонть ськамо мон аштян…
Меельце трамваенть гайтькезэ сезевсь,
Яла эйсэть учан.
Тошнаямосо седеем пешкедсь,
Кельме ацамос ваян…
Лампинем учомадот таго сизесь,
Яла эйсэть учан.
Вельмекшныть арсемат, а нетян ней тонь,
Янксемась чаракавты прям…
Ней зярдояк а вастоват мартом?
Яла эйсэть учан.
Тошксить чувттнэ: тон а марят, а сат,
Стяко седеем стоман…
Цецянь пусминесь коморсом пужи,
Яла эйсэть учан….
***
«Весь весе опаня…»
Весь весе опаня, седеем соланя,
Ковось менельга уи.
Кода вечкевиксэм юты икелевам,
Оймем ливтямо туи.
Озатан мартонзо аштеме вальмало,
Седеем токнозь токны!
Варштак, седей пельксэм, ашола панарсо
Панжтыця лёмзёркс уды.
Тон иля пеле, тонь ашине пильгинеть
Росас а начтавить ней,
Кандтан мон, лембинем, кедь лангсо кудо видьс,
Кадык тикшеськак сэрей…
Тон иля пеле, монь марто а экшендят,
Ушосонть лембе, паро…
Кунсолык седеем талныця токноманть –
Марят вечкемань моро.
***
Паламак монь
Паламак монь,
Паламак кеместэ,
Кадык паламот эйсэм кирвитолокс пици!
Паламак монь,
Палсемек виевстэ,
Кадык вечкемась эрямонь кияванть эйсэнек вети…
Ванстса мельсэм
Лембе кутмордамот,
Кадык сон толсо кирвастни, лакавтни верем!
Ванстса мельсэм
Кольниця варштамот,
Кона токновты нейгак талныця седеем…
Саламак монь,
Саламак монь тестэ,
Кадык вечкеманок сонсь Верепазось несы,
Саламак монь,
Ливтятано вейсэ,
Тов, козонь менельстэ минек уцясканок сы…
Паламак монь,
Кутморяк кеместэ,
Ды киненьгак ней илямак, илямак максо!
Паламак монь,
Иля нолда кедьстэть,
Сонсь Нишкепазось минек вечкеманть ванстоссо!
Паламак монь….
Паламак монь…
***
Менельсэ
(erzänj Adagio)
Йо-вай-йа-йа-йо-вай…
Тон эрят седейсэм,
Тон эрят оймесэм,
Тонь марто минь вейсэ
Ливтнетяно масторонть велькссэ…
Вант, кодамо мазы,
Вант, валскесь венть лазы,
Ванькс, маней чипаесь
Менельс валдоналт каясь…
Монь кедьсэм тонь кедеть,
Ювк мерить тонь череть,
Тон - сиянь валдо он,
Кона совась эрямозом…
Минь мартот вейсэ
Экшелятано лейсэ,
Ведь лангось цить мери,
Сельмесэть вечкемась эри…
Мизолкссот сон эри,
Сон терди монь верев,
Тов, косо мон карман
Палсеметь теке пси варма.
Тон эрят седейсэм,
Тон эрят оймесэм,
Тонь марто минь вейсэ
Ливтятано масторонть велькссэ…
Йо-вай-йа-йа-йо-вай…
***
Велявт…
Сёксь… Экше…
Симан пси чайведьте,
Коз… Сэредькс…
Пиземев пельть ды мельть.
Чамазом байгетне прыть,
Чопода пельтне кольгить,
Байгетне алов ливтить…
Оймем, седеем начтыть…
Петь-петь… Петь-петь,
Пиземеть поцерьдить.
Петь-петь… Петь-петь…
Потмура пельтне кольгить.
----
Петь-петь… Петь-петь…
Эрямось - нармунень ки,
Велявт… Велявт…
Таго тикшес эйсэм правт.
Велявт… Велявт…
Таго, кизэ, велявт….
Петь-петь… Петь-петь…
Поцерьдить начко пельть.
Петь- петь… Петь-петь…
Менельсэнть - сёксень пельть…
Велявт… Велявт…
Таго тикшес эйсэм правт,
Велявт… Велявт…
Вечкемам, таго велявт,
Велявт… Велявт…
Таго тикшэс эйсэм правт.
***
2014 ие.