 |
|
Кода эрзятне лемдить-тешкстнить ШКАНТЬ молеманзо?
Шкадонзо…
Эйкакшпингстэ янксить:
-Шкась а капшавтови...
Сыречистэ арсить:
-Мекс а лоткавтови?
Тензэ мерить: - Шказо...
Сон теевксэсь Пазонь,
Пингтне тензэ сазорт...
Истя Шкадонть арсян
Ды од иес чалгсян...
Эрьва мейсэ пешксесь
Шкась пилесэм вешкси...
ШКАСЬ – те Инешкипазонь арсевксэсь-теевксэсь. Секскак эрзянь кельсэнть ванстовсь кезэрень кевкстема парцунось. Эрзятне а кевстнить истя: - Зяро шкаСЬ?. Эрзятне пачк кевкстнить: - «Зяро шкаЗО?» . Сонзэ, Инешкипазонть, ШКАЗО…
Шка…Шка.. Шка… Те валсонть марявить шканть молема кашторксонзо… Шаштомазо… Ювкадемазо…
Сехте покш шкань ютконтень эрзятне мерить ПИНГЕ.
Пингенть кувалмазо покш. Ули ловома пинге. Эйсэнзэ 100 иеть. Ули ЭРЯМО ПИНГЕ. Эрямо пингесь онксты ломаненть эли меньгак эриксэнть эрязь пингензэ.
Пинге… Пинге… Пинге… Гайтев валось. Гайги налчирькень свисть сурекс-тетивакс. Пиннньк… ды кивчкадсь эрямо пингесь нолдазь налокс… Азё муик… Косо сон?...
Седе вишка шка пельксэнтень эрзятне мерить ИЕ… Мазый валось… Аволь валгак. Моро… Ие… Ие… Ие…
Эйсэнзэ эрить ТУНДОСЬ…. КИЗЭСЬ… СЁКСЕСЬ… ТЕЛЕСЬ… Эрьва ие пельксэнть эсензэ моронзо… Эрьванть эсензэ гайтезэ…
Ютазь иентень эрзятне мерит МЕЛЯ… МЕЛЯТ… Ютась иесь… Ансяк ломаненть мельсэ сон кадовсь ды тосо эри… Мелянь тевтне зярс шождасто лецтявить, мельс пракшныть-саевить…
Омбоце ютазь иентень эрзятне мерить МАНЫ… Маны, те уш аволь меля… Те седе умок… Мельсэяк аволь весе ютазденть кадовсь… Аволь весе лецтяви, мельс сы-саеви…
Колмоце ютазь иентень эрзятне мерить МАНЫДЕ ИКЕЛЕ… Те иесь уш алкукс УМОНЬ…
А вана кода ютыть ПИНГЕДЕ ламо иеть, сеть шкатненень эрзятне мерить КЕЗЭРЕНЬ ПИНГЕТЬ…
Мазый, гайтев эрзянь валось - КЕЗЭРЕНЬ!
Косто сон саевсь минек келентень?
Истямо сон гайтев, теке васоло пургинень зэртьке, кона пачкодсь пилезэть ды кеверезь кевери тей-тов прясот-пилесэть: КЕЗЭРЕНЬ... КЕЗЭРЕНЬ... КЕЗЭРЕНЬ...
Теке аволь валгак, цела ёвкс, конасонть маряви Эрзя раськенть ютазь эрямопингезэ. Эйсэнзэ эрить виев эрзянь цёрат-маралят, мазый эрзянь тейтерть-ават, минек пазтнэ - Инешки Паз, Пургине Паз, Кардаз Сярко...
Те валось сеедьстэ сюлмави истямо валсюлмавксос: КЕЗЭРЕНЬ КОЙ, КЕЗЭРЕНЬ ШКА, КЕЗЭРЕНЬ МОРО, КЕЗЭРЕНЬ ЁВКС...
Ванкшносынек валонть теема лувонзо.
Койсэм КЕЗЭРЕНЬ валось эрзянь кельсэнть эри пек умонь шкатнестэ, КЕЗЭРЕНЬ шкатнестэ.
Теевсь сон кавто валсто: КИЗЭ+ЭРЕНЬ.
КИЗЭ валось эрзятненень чарькодеви.
Теке эрзянь валось, аламодо полавтовозь, ули суоминь ды мокшонь кельтнесэ. Суоминь кельсэнть сонзэ зэмезэ-смустезэ секе - КИЗЭ. Мокшонсесэнть смустезэ полавтовсь, смустезэ - ИЕ. Мари раськень кельсэнть истяяк ули КИЗЭ валось. Зэмезэ эрзянсенть марто вейке.
А вана ЭРЕНЬ валось ней истямо чачосо неень шкань эрзянь кельсэнть а вастневи. Сон теевсь ЭРЯМС валстонть. Неень шкасто минь мертяно ЭРЯНЬ, сеть тевтнеде, конат ЭРЯМОСТОНОК ютасть, тусть удалов, кадовсть удалонок, ютазь читнесэ-иетнесэ, ютазь шкасонть.
Вана истя теевсь ды ванстовсь минек эрзянь кельсэнек те мазыйде мазый, теке моро, эрзянь валось - КЕЗЭРЕНЬ, рузокс - ДРЕВНИЙ.
Иенть эрзятне явтыть КОВОНЬ-КОВОНЬ. Иесэнть кемкавтово КОВТ. Те ней. Койсэм, икеле эрзятне иесэнть ловсть кемколмово КОВТ. КОВ… Мазый валось… Эйсэнзэ пачк неяви сияждыця ков валдось…
Иесэнть кемкавтово ковт:
ЯКШАМКОВ – те ковось, зярдо эрьва чистэ – цят якшамо.
ДАВОЛКОВ – учок, эрзя, ловонь даволт-бурят.
ЭЙЗЮРКОВ – лато ды кудо прятнестэ чить кольги, теевить эй сюрот.
ЧАДЫКОВ – лейтне кармить чадомо.
ПАНЖИКОВ – виртнева, паксятнева панжтыть цецят-чувтт.
АШТЕМКОВ – эрзятне зярыя шка аштить-оймсить сокамодо-видемадо мейле.
МЕДЬКОВ – эрзятне таргить медь, ярсыть медьте.
УМАРЬКОВ – кенерить умарьтне ды лия марьтне-эмежтне.
ТАШТАМКОВ – эрзятне теить таштавкст сы телентень.
ОЖОКОВ – сёксесь ожолгавты вирьтнень.
СУНЬДЕРЬКОВ – читне нурькинеть, суньдерькстнэ кувакат.
АЦАМКОВ – телесь сась ды ацызе моданть ашо ванькс ловсо.
Ковонть эрзятне явтыть истя: КАСЫ КОВ, ПЕШКСЕ КОВ, МАШТЫ КОВ, КОВТОМО ВЕ (СОКОР ВЕ)… Лисни, явтыть ковонть ниле ТАРГОС.
ТАРГОСОНТЬ – сисем ЧИТЬ:
АТЯНЬЧИ, ВАСТАНЬЧИ, КУНШКАЧИ, КАЛОНЬЧИ, СЮКОНЬЧИ, ШЛЯМОЧИ, ТАРГОЧИ.
Атяньчистэнть кудораськень прявтнэ-атятне макстнить тевть цёраломантненень.
Вастаньчистэ сыряватне макстнить тевть аваломантненень.
Куншкачись тешксты таргонть куншканзо.
Калоньчистэ эрзятне сюконильть Ашо калавантень ды пидильть штюрьба.
Сюконьчистэ эрзятне кундыть тоначив туезь покштятнень-сэрдятнень лемест.
Шлямочистэ – шлить банясо.
Таргочистэ – оймсить аламодо эрьвачинь тевтнестэ.
Ютазь чинтень эрзятне мерить ИСЯК. Омбоце ютазь чинтень мерить ИСИНДЕ ИКЕЛЕ.
Колмоце чинтень ды лия а умок ютазь читненень эрзятне мерить УЛКО… УЛКОТЬ…
Чинть эрзятне явтыть истя: ЗОРЯНЬ ЛАЗОМА, ПИЖЕ ВАЛСКЕ, ВАЛСКЕ, ЧИЛИСЕМАДО ИКЕЛЕ, ЧИЛИСЕМА, ЧИЛИСЕМАДО МЕЙЛЕ, ЧИНЬ СТЯМО, ЧИ КУНШКА, ЧИ ВАЛГОМА ЛАНГО, ЧИ ВАЛГОМА, СУНЬДЕРЬГАДОМА ИКЕЛЕ, СУНЬДЕРЬКСТ, ЧОПОЛКСТ, ЧОКШНЕ, ВЕ, ТАЛАЙ ВЕ, ПЕЛЕВЕ, ВЕНЬ ПРЯДОМА ЛАНГО…
Сыця чинтень эрзятне мерить ВАНДЫ… Омбоце сыця чинтень – ВАНДЫДЕ МЕЙЛЕ..
Лия сыця шкань юткотнень эрзясь лемди СЫ валонть марто: сы таргостонть, сы ковстонть, сы иестэнть, сы пингестэнть…
Ней молиця чинтень эрзятне мерить ТЕЧИ. Лиякс меремс ТЕ ЧИСТЭНТЬ. Аволь тона, аволь се, аволь лия конаяк… Течи – те ТЕ ЧИСЬ.
Ней молиця иентень эрзятне мерить ТЕДИДЕ. Лиякс меремс, ТЕ ИЕДЕ, ТЕ ИЕСТЭНТЬ.
А вана течинь вентень эрзятне мерить ТЕДЕВЕДЕ. Меремс, вана истя: - «Тедеведе беряньстэ удынь. Эзинь матедевкшнэяк…»
Лиякс меремс, ТЕ ВЕДЕ, ТЕ ВЕСТЭНТЬ.
Весемеде нурька шка юткотненень-пелькстнэнень эрзятне мерить истя: НЕЙ… Ней, те ней, сестэ, зярдо ломанесь НЕИ теезенть, теевицянть, теевкшныцянть, сень, мезезь неяви сельмсэ. Те валстонть теевсь НЕЙКЕ валось, конань зэмезэ истямо: шкань апак сацтне, апак таргсе, апак ёмавтне. Лиякс меремс – СЕСК, эли СЕСКЕ. Неть валтнэяк онкстыть шканть. Невтить сонзэ нурька ютконзо.
Сехте нурька шкань юткотненень эрзятне мерить СЕЛЬМЕ КОНЧТАВКСОКС эли СЕЛЬГЕНЬ ПРАМОКС. Неть шка юткотне ЮВК ютыть, мельгаст а кенерят…
Зярдо эрзясь важодсь валскестэ саезь чокшнес, сестэ мерить ЧОП. Лиякс – чопотемас, чоподань прамос, ЧИНЬ ПЕРТЬ. Вестэ тевтнеде мерить ВЕНЬ ПЕРТЬ: - «Веньберть ютась виев пиземе…», - «Вень перть увсо пувась виев варма…»
Истяня эрзятне ловокшность-тешкстнесть ШКАНЗО молеманть, зярдо эрзятнень арасельть ды сынь эзть сода шканевтимть (часы).
Вансть чипаенть лангс, ковонть лангс, вансть перть пельга ды эсест ладсо-койсэ, эрзякс тешкстнесть ШКАНТЬ молеманзо.
Рузонь келенть трокст совасть эрзянь кельс шкаютконь од лемтне: ЧАС, МИНУТА, СЕКУНДА. Неть валтнэ аволь рузонь. Рузонь кельс сыньгак совасть лия кельстэ.
А вана кода сынст лемдяма эрзякс? Теевить-арась неть валтнэ эрзянь келенть вельде?
Улема, часонтень эрзякс меремс аволь "час", меремс "ШКАКС"? Минутантень меремс "МЕНЬЮТКО" (мени+ютко)? Секундантень меремс "СЕСКЮТКО" (сеск+ютко)? Эли лиякс кода? Эли кадомс келезэнек сазь валтнэнь?
Кие соды? Кияк…
ШКАЗО невтьсы…
***
Одирьва ды нардамо.
(Наста авань ёвтнеманзо корява. Тензэ ёвлекшнызе Варка сырявазо.)
Вейке кезэрень ды мазый эрзянь велесэ эрясь-аштесь седикеле вейке кудораське. Веленть лемезэ ульнесь Вадов веле. Покшоль велесь. Куринкатнедеяк ламолть эйсэнзэ. Сехте покшось ульнесь Одкуринка, лиятне – Алопе, Верепе, Эрькелей, Кутор, Пенза, Колка, мик Кенерьпакарьгак ульнесь нурька куринкине, кона явиль Пенза куринкастонть трокст ве ёнов. Васов таргавкшнось Вадов велесь Карголеенть кувалт.
Покшоль се эрзянь кудораськесь. Сюпаволь. Мезест ансяк арасель кардайсэст-пиресэст. Алашат, скалт, реветь, тувот, дигат, саразт, мекшть, мик куркасткак лиясто ульнесть-эрсесть.
Кудазоронть лемезэль – Ишут, кудазораванть – Нуякша. Сынст ульнесть кавто цёраст – Сэрьге ды Кията, ды колмо тейтерест Вияна, Лияна ды Литова. Покш цёраст, Сэрьге, урьвакстозель, уш сонсь видиль-сокиль, низэ тензэ кавто эйкакшкеть чачтась.
Сась шка мирденень максомс покш тейтеренть, Виянань. Тейтересь мазыель, кеме рунголь, теке марто ёлганяль, теке чова селейне, ванькс ашо чамаль. Сельмензэ – теке сэнь домка эрькть валдосо цивтёрдылть. Варшты лангозот – паро ёжосо казтянзат. Варштат лангозонзо, сельметькак мазычистэнзэ теть мекев а саевить. Вадряль тейтересь, весемесэ, кода мерить, сайсь. Чамасояк, рунгосояк, валдо превсэяк, чевте седейсэяк, ёроков кедьсэяк. Истятнэде эрзятне пачк мерильть: аволь тейтерь - Инешкипазонь казне. Лия эйкакштнэяк весе ульнесть пек вадрят, ансяк Вияна ютксост ульнесь парочисэнзэ сехте сельмс каявиксэкс-неявиксэкс. Вечкилизь сонзэ тетязо-авазояк, лелязо-ялаксозояк, сазорнэнзэяк.
Ансяк сась шка, ды састь покшкудат чиямонзо. Авардезевсть тетятне-аватне, талнозевсть лелятне-ялакстнэ ды сазорнэтне, ды тейнемс а мезть. Кенерьсь Вияна тейтернесь. Теевсь мацеень кондямо мазый тейтерекс. Сась шказо мирдене лисемс. Кода эрзятне мерить, кенерезь умаренть чувсто эряви шкастонзо кедьс саемс, лиякс сон сонсь пры. Истяня арсесть-тейсть тетят-ават ды алтызь Вияна тейтерест, седей пельксэст.
Чиямо чись ютась вадрясто. Ломо инжеть сакшность од содамонть ды одирьванть пельде. Максызь паро кудораськес. Атявтонь-ававтонь кудораськеськак покшоль. Сюпаволь. Важодемань вечкицяль.
Ютась пель ие. Сась Вияна эсь тетянстэнзэ-аванстэнэ инжекс, тиринь кудов. Авазо кевкстни:
- Кода, сырнень покольнем, эрят од кудосо? Стака теть, аволь?
Тона мери:
- Аволь стака, авакай. Аволь стака, тирякай. Мирдем вечксамам. Ававтом мелем ваны. Атявтом а покори. Весе вечксамизь. Весе кольневтить эйсэм. Стака тевс а аравтыть, муськемасо а сизевтнить. Эрямом пек паро. Ансяк вейкесь аволь паро. Валске стян, шлян, нардтнеме карман – нардамось пачк летьке, пачк начко… Ды истя эрьва чи… Мекс истя, а содан… Мезть тейнемс, а содан…
(Кезэрень шкатнестэ шлямо таркасо пачк ульнекшнесь понгавтозь ансяк вейке покш, коцтонь, нардамо.)
Укстась авазо, таргизе оймензэ, ды мерьсь:
- Тон, левкскем, стякшнок весемеде икеле, сестэ нардамось пачк коське карми…
Истя тейтересь тейськак.
Топавтызе аванзо превспутоманзо ды кармась эрямо седеяк уцяскавсто. Чачтась вете эйкакшт, кастынзэ-тринзе ды кулось ве чистэ вечкевикс мирдензэ марто.