Здавалка
Главная | Обратная связь

Ваньксчинь сравтнема



Эрзянь арсем ёвтнема (новелла).

 

Кода иля арсе, кода иля тее, ялатеке эрзянь эрямосонок улить тевть аваломанень, улить тевть – цёраломанень. Цёратне теить –топавтыть сеть тевтнень, конат вешить вийть, виень путомат, конатнеде цёратнень копорест начкить ливеськадомадо, псилгадомадонть начкить ливезьденть панартнэнь кутьмерест-лавтовост, кавалалксост, мештест…

Кить теде мейле муськсызь-валакалевтьсызь цёратнень оршамост? Нама, минек эрзянь аватне.

Эрзянь аватнестэ моли эрзянь раськенть ваньксчизэ. Сынь муськить-лопавлить оршамотнень-ацамотнень… Мейле сравтнесызь сынст костямо пикска. Тельняяк, кизнаяк истя…

Нейгак монь сельмем икеле шлямочинь аваломанень кудо ютконь тевтне. Баня уштыть, ведь курсясо канднить, муськить-лопавлить. Очко велькссэ комазь… Лей чиресэ сэдявкстнэс пульзязь … Платияст пштедезь карксамос… Кодат сынь те шкастонть мазыйть!

Зярдо цёратне сыть паксясто, тенст сави ансяк кайсемс каргоць оршамост, саемс авань чевте-лембе кедьсэ анокстазь ванькс оршамотнень ды туемс уштозь-явавтозь баняв. Зярс сынь тосо шлить-парить, аватне те шкастонть прядсызь муськемаст.

Ней сехте мельсвалдо тевесь – мускиматнень сравтнемась. Окойники эрзянь авась видемтьсы стомавтозь- сизезь рунгонзо, сэставтсынзе сизезь карязонзо, нардасынзе икельць пацязонзо начко, сапонденть ашолгадозь-лоподезь кедензэ-суронзо. Кепедьсы муськима марто ашо кшнинь керезенть ды лиси кардазов муськиматнень сравтнемест.

Кодат мазыйть тень пингстэ эрзянь аватне! Рунгост видеть! Чамаст валдот! Сельмест цивцёрдыть тевень топавтома-прядовома кенярксчинь валдосо.

Кедест, тодов лангакстнэнь марто, неявить теке келемтезь ашо локсеень сёлмокс. Рестедьсызь ашонть, теке ливтямо снартыть! Платияст тень пингстэ кепедевить аламнешка верев ды панжить седе верев сынст кеме, мазыйде мазый, ашо лов тюсонь пильгест… Сельметькак эйстэт а саевить, салавине виздезь варштазь…

Монень пачк марявсь, те истяня эрзянь аватне аволь ашо муськимат понгавтнить, сынь сравтнить истя сонсензэ Модамасторонть ВАНЬКСЧИНЗЭ…

Улема, секскак истямо тантей ваньксчинь чинесэ качадыть одс ацазь ацамотне, конатнес ваязь ваят эрзянь банясо шлямодо-парямодо мейле?

Матедевемстэ, лембе удома сувонть пачк таго неят, кода мазый рунго, эрзянь од ава, ашо кедьсэнзэ сэнь менельганть сравты эрзянь раськенть валдо Ваньксэнзэ…

 

***

 

 

Чирязонь теште

Раськень Озксонь анокстамонь меельце эвтемань читне улнесть вадрядояк вадрят. Манейть, лембеть, кувакат. Истямо читнестэ, мерят, ойметькак сэрей менельганть ливтни-укшны, тува, кува раужиньке налткекс-салмукскекс неявозь ювныть цянакатне, кува пачк нетвиця ашо парсеень кондямо шожда сувнэтне венстизь локсеень сёлмост певтеме менеленть келес. Лембе ялткетне састыне пувсить сынст чивалгома ёндо чилисемав. Эрзятне ванды пурнавить ине покшчис. Сеть, кинь ойместэ эзь нардавт эрзянь мелесь, эрзянь койтне-илатне, палозь палыть те чинтень анокстамо тевтнесэ. Тевтнеде… Пест арасть… Эрявить важодиця машинаткак, кедтькак, валдо превтькак. Ломантнеде аламо, ансяк сеть, кить састь те ине чинтень, анокстамонзо-ютавтомонзо, кемить — весемезэ топавтови шкастонзо.

Кода эно. Тевтнень вети сонсь Пиргуж эрзянь Инязорось. Ломанесь кеме, теке ламо пингень тумонь мукорь. Сон таргошка тия лаки. Ардтни тей-тов. Пиже валскестэ талай вес маряви кемевтиця-меревтиця вайгелезэ. Васня Кшуманця ды Игнад велесэ, мейле Чукалсо, мааронть перькава, ды мейле мекев… Истя чинь чоп. Чамазо чинть каршо тюжт мери шумбрачинь вийсэ. Валдо сельмесэнзэ, мелявкстнэнь пачк неяви эрямонь вий ды маней, виев потмо ёжо. Вакссонзо — кеме нежеть, нардев лездыцят: Гайнинькань Пичай, Кирдянонь Васяй, Юринь Михал… Сынь сизема а содыть, шканзо молеманть а марить. Лаказь лакить тевтнень топавтомсто. Лиякс эрзятне а маштыть, зярдо кундыть мельс туиця тевс. Покштнэ важодить — мельгаст пштисэ вана ва колмоце чи пштисэ ванныть колмо цёрынень весемень неиця сельминеть. Колмоце чи мааронть ваксс чиньстямо марто малавикс велестэнть чийнить неть кеменьшка иесэ эрзянь цёрабайтне. Мезеяк тесэ а юты пшти сельмест вакска…

Вана од цёрась витни мааронь кевенть. Цёрынетне чарыть перькаванзо: — Те мень кев? — Мень тешкс истямо мазый теезь лангсонзо? — Кие кевенть теизе?.. Теке киска левкст чарыть цёрынетне эрзянь мазый, од цёранть перька. Налкстыть тензэ. Тона кшувавтсынзэ, иляст меша. Сеть, теке озяскеть, ливтить ве ёнов, шкань ютазь одс маар кевенть перька пурнавить… Тосо вана солавтыть шта, конанть эйстэ мейле валовтови Пазонь Штатолось. Гувны пси толгельсэ толпандясь. Тей кантневи ведь, тесэ лазновить пенгть… Тияяк велить пакшатне. Тенст эряви содамс, кода солавтови штась, мейсь эряви ведесь, кода валови Штатолось…

Маласо вирьнесэнть анокстави ведень саема ды симема тарка. Вирев латконть потмова чуди чудикерькс. Ведезэ — сиянь, ванькс, тантей. Лисьмапрятне, косто саеви чудикерьксэсь — а васолот. Секскак ведезэ симемскак маштови. Содасть минек покштятне, кува озксонь ютавтома таркатнень кочкамс! Цёрынетне лездыть Пичай лелянтень сёлтонь теемстэ. Синтрить тарадткеть пирявкскентень, ацыть коське тарадсо яннэнть, кона вети сёлткенть малас, теить ютамо-чалгамо тарка, пильгест ломантнень иляст начко ведень саемстэ. Весе, мезе иляст тее тесэ покш ломантне, пек тукшны цёрынетнень мельс. Мейле мон некшнынь Раськень Озксонть ютавтомсто неть цёрынетнень. Сынь пштистэ вансть, кода стявтыльть Штатолонть, кода ютась Штатолонь кирвазтемась, Инешкипазнэнь ды покштятнэнень Пшкадемась, мааронь одкстомтомась, раськекирьксэнь теемась… Эрьва косо сынь ульнесть, эрьва ков кенерьсть… Штереть… Ёрот… Ансяк сехте пек мельсэм кадовсь вана се…

Чокшнэ ёнов, зярдо тевтне прядома лангсольть, минь, эрзянь Чирязтнэ, тердинек Инязоронть ютавтомо истямо Раськень Озксонь икелень коенть: лисьмапрянь ведьсэ Инязоронь шлямо. Тень туртов теезель сёлтке, чиреванзо ацазель ансяк ледезь, тантейстэ качадыця тикше. Путынек Инязоронть тикшенть лангс ды ваньксстэ ванькс ведьсэ валнынек-шлинек прясто пильгс! Инязорось мик урнось-ирнэсь истямо мельспародонть ды зярдо стясь тикшестэнть кеме пильгензэ лангс — икеленек вельмесь теке од цёра: Ванькс! Виев! Валдо ойме! Кеняркс варштавкс! Алкуксонь эрзянь Инязор! Те коенть лангс, сельмень пезнавтозь, вановтонь апак сайне, пштистэ вансть неть цёрынетне. Каявсь сельмезэм эйстэст вейкесь: ашола прине, валдо, превей сельмине. Кевкстимизь сон, келя, те мень кой истямо? Те кие истямось — Эрзянь Инязоро? Мень теште поводезь Чирязтнэнь ды Инязоронть мештьсэ?

Зярс оршнинек, Пичай чирязось лембестэ кутмордынзе цёрынень лавтовонзо ды ёвлесь тензэ эрзянь Инязортнэде. Невлесь тензэ: — Вант! Те вана икелеть алкуксонь эрзянь Инязорось!- Тона аволь пилесэ, панжадо сельмсэ-оймесэ кунсолось… Неявсь, арсеманзо верьга-васолга ливтнесть… Меельцекс Пичай лелясь кевкстизе цёрыненть: — Мезе, ней содат, кие те, эрзянь Инязорось? Тона ахолдась прясонзо. Пичай поладызе кевкстеманзо: — Ули мелеть, зярдо касат, улемс эрзянь Инязорокс? Цёрынесь таго ахолдась прясонзо ды кеместэ мерьсь: — Ули! Карман Инязорокс!

Пичай, кеме, сэрей эрзянь цёрась, састыне саизе цёрыненть кавто кавалалдо ды кепедизе виев кедьсэнзэ цёрыненть верев, менельс: — Ванодо, эрзят! Вана кодамо эрзянь цёра касы тенек Инязорокс! Мон саия кирьгастом чирязонь тештенть ды понгавтыя цёрыненть мештьс: — Кирдть, цёра, Чирязонь тештенть! Те чешксэсь невтьсы теть кинть, кода теевемс эрзянь раськень Инязорокс!

Омбоце чистэнть, Толай чирязось, кона теизе ды казизе тень те кандтнема тештенть, марявсь, аламодо а мельсэ, кевкстимим: — Мекс Чирязонь Чешксэнть-тештенть а канднят? Визделгадынь икелензэ, мейле ёвтния — кинь мештинесэ ней Чирязонь тештесь. Толай атясь мельспаросо мерсь: — Паро тев теить… Инязор касы…

Монгак тенень кеман: — Каст, Эрзянь Инязор!

2007 ие.

***

 

"Секс"

(кода рузонть эрзякс кортамо тонавтынь)

 

Ардан Питерстэ Эрзянь Масторов, Раськень Озксов. Ускимесь-поездэсь - Санкт-Петербург-Самара-Уфа. Ускимкрандайс-вагонс совамстон
купесэ-кошопелькссэ озадотнень марто шумбракстнинь эрзякс. Кавтотне варштасть лангозом а чарькодиця сельмсэ, колмоцесь, ашназа прячерь цёрась, каршозом мерьсь «Шумбра чи!».
Мелем витевсь. Ардомась малав кавто чить. Ней карми кинь марто эрзякс ардоманть перть кортамс эрзякс. Ёвтыя лемем. Цёратнеяк каршозом. Ломантне весе понгсть сэтьметь, а таргицят, лия ломанень мелень ваныцят.
Нама, васняяк кортазевинек эрзянть марто. Мон эрзякс. Сон каршо рузокс. Келя, а ён рузтнэнь ютксо улемстэ тенек кортнемс эрзякс. Кода пачк, истямо меленть каршо мон пелькстазевинь мартонзо.
Кода цёрась эзь пота удалов, пшкалинь тензэ пачк эрзякс. Тень кувалма сонгак эрзянь келенть кармась лецтнемензэ. Ёвтнесь, Питерс кадовсь ушмовийсэ урендямодо мейле. Тоско урьвкстсь. Низэ рузава. Эйкакшонзо эрзянь келенть аздасызь.
Ёвлинь тензэ Раськень Озкстонть. Нама, мезеяк теде аздыль. Тердия. Мерьсь а молян. Тевем, келя, велесэ ламот, эряви кардайсэ-пиресэ лездамс аванстэнзэ-тетянстэнзэ… Нама, мелем теде колавсь аламодо. Ды мезе теят. Истятнэде минек юткова ней ламо. Судодонок икелева васов а вантано, а нетяно…
Ансяк, ёвтнеминесь аволь теде. Лиядо.
Эно, ардтано, кортнетяно. Рузтнэ кунсолозевкшнесть эрзянь кельвалонтень, терявтсть чарькодемензэ, кона-кона эрзянь валтнэнь ёвтамост. Те марявсь тенст стакакс. Вейкесь, келензэ аламодо эрзянь валтнэс синтресь-тейсь, ды мери: келя, пек стака келенк, рузтнэнень а тонавтови зярдояк.
Пейдемкакс меринь тензэ, келя колмо-ниле
валтнэнь сон куроктояк курок тонавтсынзе. А кемезь, тона мери: келя, арась, а тонавтовить тень…
- Вансынек!,- мерян тензэ.
Кевкстни: - Кодат валтнэ сехте шожда тонавтовить?-
Мерян рускс: -«Где?» «Там!»
«Почему?», «Потому!» и «Хорошо!» валтнэнь.
Мейле ёвлян тензэ рузокс истямо ёвкске:
Вана пачкодят тон кудов Питерстэ. Соват кудос. Кудосонть нись арась. Кодамо мель прязот васняяк сы? – кевкстнян эйсэнзэ. Сон мери: - «Где?». Мерян тензэ: - Где? – эрзякс «Косо?» . Арсить-теить, нись сась, тон кевкстнят эйсэнзэ: - Косо?!
Нись каршо: - Тосо! (- Там!)
Мейле мерсь теть, келя туян эйстэть. Мезде тень пингстэ кевкстьсак?-
Цёрась мери: - Почему?- Мерян тензэ: - Эрзякс, мерян, карми: - Мекс?
Нись кевкстемат каршо мери: - Секс!
Валось чарькодеви теть? -кевкстнян цёранть. Мери, нама, кода эно, парсте чарькодеви, кие а содасы «секс» валонть! Саик мельс, мерян, эрзякс те валось – «Потому!». – Вана кода! – таргизе кувакасто цёрась.
Монсь ёвлян тензэ седе тов: -«Секс» те паро?
Мери: -Кода эно!
Сестэ мон ютавтан тензэ: - Хорошо! те – «Паро!»
Раказевинек. Цёрась ёвтынзе неть эрзянь валтнэнь. Ванан, шождасто колмоксть мерьсь: Косо?-Тосо? ….-Мекс?-Секс? … Паро! Ды истя зярыяксть.
Мадинек. Ускимкрандазось оймась. Валдонть мадстизь. Матедевинь. Сыргозинь ноцковкссто. Кенкшесь пельс панжадоль. Варштынь ютавкссонтень. Рузось састыне эскелясь ютавксканть ды моткодсь эсь пачкаванзо:
- Косо? – Тосо!
- Мекс? – Секс!
Ды мейле кувакасто: - Па-ро-ооо!
Ванькс эрзякс рузось кортась…
---- ----- ------

2007 ие.

 

Тенядо


Ули эрзянь мазый, гайтев эрзянь кельсэнек истямо покш вийсэ-смустьсэ эрзянь вал –«теня» … Сонзэ потмо питнезэ ды виезэ мик сеск а онкставияк. Сондензэ арсемс ды арсемс тенек. Косто сон саевсь-теевсь, ней кияк а содасыяк, улема…
Те, эли истя: те+ней(я), эли лиякс кода… Кие ней соды….
Ансяк вечкевсь те валось эрзятненень пекте пек. Эрьва велесэ, эрьва кудосо сон вечкеви, эрьва эрзясь сонзэ кортамсто тевс нолды…
Эйсэнзэ паро эрзясь эрьва мезьде мелензэ-арсеманзо шождасто ёвтасы. Лия валтнэ, «теня» валонть марто, лиясто мик эрзянтень а эрявитькак.
Невтемакс, вана а покш мизолкске «теня» валонть кувалма эрзянь эрямосто…

Совась вейке эрзянь авинесь шабранстэнзэ.

- Тенят, шабракай?
- Тенян, тенян, ялгакай! Эно мезть тейнемс, тенян ды тенян чинь чоп…. Мезть,
эно, тейнемс? Теняк ды теняк… Ансяк кенерть тенямо…
- Теня, мон тенян, мейсь совинь? Ульнесь мелем тенямс, мезть тон тенят….
- Тонсесь, теня, тени кодаяк?
- Ды мезть тени? Тенямозо ютась уш… Теняволь, ды а тенявияк кодаяк… Коськсь
тенязо…. Тоньсесь тени?
- Тени! Пек вечки тенямонть… Кодак сови кудос, сеск тенямос… Тени ды тени…
Истя тени, истя тени, мик мон а тенявангак…. Мерян тензэ, саты уш теть тенямс,
тенявинь уш, лоткак тенямо. Ды сон, теня, кодаяк а теняви ды весе… А содангак,
мезть мартонзо тенямс… Пес тенимим…
- Вай, шабракай, теня, тон уш сатыне кодаяк теник… Стака истя тенязь…
- Нама, ялгакай, стака истя тенямс…
- Ды, теня, мейсь мон совинь? Тенян ды тенян мартот… Шказо кудов тенямс…
Теням,секень вант, кудов тени… Тенян эйстэть…
- Теня ульть!
- Тонгак теняк!

Ды шабрась тенясь…

Ней тынськак тенядо, эрзят, чарькодевсь ва «Тенядо» мизолкскенек…

(Те эрзянь мизолкскенть тенизь эрзятненень Эрюш Вежай Темаень Анге марто. Илямизь теня пек, эрзят, инеськеть, те тенянок кисэ:). Арсетяно, те мизолкскесь киненьгак ды зярдояк а ютавтови а рузонь кельс, а лия раськень кельс. Истя эрзят?)

***

 

Си дэ моль

Мезе те, «си дэ молесь»?
Монськак те шкас парсте а содан, мезе те…. Койсэм, аламо сетнедеяк, кить сеск содасызь ды чарькодьсызь те аволь эрзянь валсюлмавксонть, мезень смустесь ули неть аволь эрзянь валтнэсэ…. Кода мерильть минек велесэ, монь туртов, те - та-кодамо а чарькодевикс МЕЗИЯКО….
Вана те мезиякодонь те нурька ёвтнемамгак…
Киятань ускизь чугункань ки лангонь станцияв эрямо, зярдо сонензэ топодсть кевейкее иеть ды сон прядсь ниле класст эрзянь велинесэ. Тетязо Киятань, видьстэ меремс, арасель… Кода кортась Федай вечка сырькаезэ, содамозо те шкане лытась-злыдарьдсь та-кодамо Камчаткава. Тень пингстэ вете эйкакшонзо кадокшнынзе бачканзо ды мачканзо кедест-сявдиксэст лангс.
Кията – те, нама, цёрыненть веле ютконь лемезэль. Кортыльть, келя, ульнесь сонзэ покш покштянь покштяезэ, конатань лемезэль Кията, секскак Киятаненьгак педясь те велень лемесь. Кията ды Кията…. Рузонь лемсэ тензэ мик кияк а пшкадильгак. Ансяк школасо тензэ пшкалильть буелемсэ – Кияткин.
Кизэнь перть Пачелма рузонь станциясонть Насько авазо, ды Андрей вечка покштязо, вешнесть рамамс кодамояк кудыне. Кажвелинесэнть кудост савсь миемс. Велинесь ульнесь колоньгемень колмо кудосо.
СССР масторсонть мольсь колхозонь покшолгавтома тевесь. Вишка велетнестэ саизь весе алашатнень ды скалтнэнь Захарка велев. Велинесь кадовсь алашавтомо. Колоньгемень кудот – алашавтомо, скалонь стадантькак, алашатненьгак панизь Захарка велень фермав. Ней Кажвелень эрзятненень а мейсэ а пире сокамс, а тикше ускомс, а пенгс якамс….
Андрей атя те кажонть-зыянонть лангс ванозь, ды теде домкасто арсезь, сась мельс: - Сави туемс станцияв эрямо. Тесэ ней, алашавтомо, вачодо кулотано….-
Истя, тёжа вейксэсядт котгемень котоце иестэ, вейке пек стака кизэнь ушодкс чистэ, весе кудонь ули-парось вачказель ГАЗ-51 сталмонь усксиця машинас ды Киятань кудораськесь сыргась вешнеме од эрямо рузонь станцияв, конань лемезэль Пачелма. Нейгак сон ашти Пенза ёнкссо… Ламо иень ютазь Кията те чиденть сёрмадызе эсь васенце валморонзо, конасонть невтизе весе оймензэ ченгеманзо-паломанзо чачома таркастонзо стакадо стака явоманть кувалма:
- Течи минь тутано тиринь масторстонок…
Мон чиян, ранган… , кепе, картузтомо,
Седеем ськирды ризксэсь. Теке лазы!
Ойминем явтыть, нельгить эрзянь пазом…
Мон чиян, ранган, авардян вайгельсэ,
Мейсь минь кадтано кудом – седей пелькскем?
Кадтано виренть, каленть, Сургут леенть,
Ютазь тундоне озавтозь килеенть…
Мон чиян, ранган, вайгелем мик ёмась,
Течи минь тутано, ванды – ёми модась….
Истя лисськак. Вете иень ютазь Кажвелиненть таркасо кадовсть ансяк калавтозь кудоюртт, конатнень лангсо тустосто кармасть касомо сэрей марчт ды пиципалакст. Калмазырень пирявксось ды крёстнэяк пракшность ды наксадсть вандора пандочамасонть… Пиретнесэ кадовсь коськеме урозокс мастумарь ды умарь чувтот, конатнень тарадс ней а токавкшность азоронь важодиця кедть… Инзейтне ды чукшторов куротне весе курок коськсть, лисьматне лондадсть…
Эрзянь велинесь ёмась Мода масторонть чамасто.
СССР масторось тень пингстэ, удалов апак варштне, капшась эсь асодавикс-аучовикс икелепелезэнзэ. Каладомазонзо…. Лондадомазонзо. Тень пингстэ, превень тунь апак путо, меремс, стякодо, калавтсь эрзянь велетнень….
Ков молемс-теевемс эрзятненень? Вачодо куломадо весе сралесть ков понгсь. Ней эрить эрьва кува, рузонь ошка: Самарасо, Пензасо, Тольяттисэ, Отраднойсэ, Тимашовасо, Серьгоскойсэ, Черькайсэ, Подбельскойсэ, Покоснивасо… Теевсть «рузокс»…. Ансяк конат-конат велявтсть мекев Захарка велев, тов, косто явсть 1920-1923 иестэ, зярдо топавтовсь Ленинэнь меремазо: - «Модась – сокицятненень, видицятненень!»
Ансяк, ёвтнеминесь течи аволь теде. Течи пачтямось-кортамось «си де мольде»…
Кавто ковонь перть рамазь кудынесь Будённоинь лемсэ апокш кудокурынесэнть анокстазель эрямос. Теезель од, ламо вальмав, кудыкелькс. Кудось чавнозель-оложазель чова чувтонь лазнэсэ ды артозель. Важодемась мольсь чинь чоп. Киятань авазо мусь важодема тарка бетонсто теевксэнь заводсо, школасо тонавтыцянь тевензэ савсь тензэ стувтомс… Заводсонть важодемась стакаль, ансяк тосо пандыльть кавксть седе ламо школасо важодеманть коряс.
Киятаяк лездась покштнэнень, мейсэ сатыльть цёрынень виензэ. Теке марто кенерьсь теевеме ялгакс куринкань ды шабрацек эриця эйкакштнэнь марто. Ютксост ульнесть ансяк рузт ды татарт. Савсь ютамс кортамо рузонь кельс. Эрзят тесэ арасельть…
Ютась кизэсь. Сась шказо молемс школав. Ветеце классос. Кавто шабрацек эриця цёрынетне текекс мольсть тонавлеме ветеце классос. Кията пурнась, сась школав ды озась секе классонть, косо тонавлесть од ялганзо. Ветеце «А» классос. Сон эзь сода, сонзэ, кода весе лия эйкакштнэньгак, конатне састь станцияв тонавлеме ушоткс школатнестэ, сёрмадызь ветеце «В» классос. Ютась васенце тонавт шкась-урокось. Ушодовсь омбоцесь…. Апак учо, тонавтома нупалентень совась ветеце «В» классонь ветицясь. Кевкстясь: - Кияткин тесэ ули-арась? –
Кията кепедизе кедензэ: - Мон Кияткин… -
Ветеце «В» классонь ветицясь мерьсь: - Тон цёракай, сёрмацтозят ветеце «В» классос. Секскак саика юдминеть ды мольть мельган…-
Мезть тейнят. Савсь Киятанень молемс мельганзо. Озавтызь сонзэ ветеце «В» классос. Ютась омбоце урокось… Ветеце «В» классонть. Киятань мельс эзь туе те классось… Киньгак тосо сон а содыль… Весе эйкакштнэ а содавикст. Ды истя ламо эйстэдест… Комсь ветеешка… Аволь кода Кажвелень ушоткс школасо ульнесь… Тосо ульнесть ансяк сисем эйкакшт, ды весе содавикст-малавикст, весе ялгат….
Цёрынесь таго пурнызе юдминензэ ды колмоце уроконть таго ютавтызе ветеце «А» классо, косо ульнесть куринкань ялганзо. Мельганзо таго совась ветеце «В» классонь ветицясь. Кармась саемензэ мекев ветеце «В» классов. Кията мерьсь: - А молян тов….
- Мекс истя?, - кевкстизе тона классонь ветицясь.
- Мелем арась. Мелезэм эзь туе се классось. А молян тов, ды весе… - нолдызе конянзо алов Кията.
Мезть тейнемс кадовсь саицянстэнзэ? – Адя мартом, школань директоронтень. Кадык сон ёвты, мезть мартот тейнемс, истямо букакстницянть марто…
Ветизе директоронтень. Тона кепедизе чаманзо конёвтнэнь эйстэ, сизезь сельмсэнзэ варштась талныця цёрыненть лангс, классонь ветиенть лангс: - Мезе цёрыненть марто?
Классонь ветиесь: - Ды вана, орголи монь класстонть «А» классов… Кавксть сайния сонзэ мекев, сон таго тов моли… А содангак, мезть мартонзо тейнемс…
Иев, улень ушманось, стакасто таргизе оймензэ, лекстясь. Стясь, мольсь цёрынентень, путызе лембе кедь лапушканзо цёрыненть прязонзо. Варштась чамазонзо ды кевкстьсь: - Мекс, ялгинем, вецеце «А» классос орголят?
_Кията носкозевсь ды панжизе оймензэ: - Монень ветеце «А»-сь седее вечкеви… Тосо ялган улить…
Директорось: - Оно мейсэ тевесь…. – Чарькодиде? – кевкстизэ «В» классонь ветиенть.
Тона келемтинзе кедензэ….
- Мезе, цёра, тунь арась мелеть «В» классос озамо? – таго кевкстизе Киятань директорось.
Кията ахолдась прясонзо: - Арась, а молян тов… Мелезэм тукшны «А» классось.
Директорось тердевтизе «А» классонь ветиенть. Кевкстизе: - Раиса Михайловна, мезе, муеви тарка классонк вана те цёрынентень?
- Муеви, Кузьма Захарыч. Ули вейке чаво парта.
- Саинк сестэ эстенк. Кады тонавли «А» классо.
Истя Кията кармась тонавлеме рузонь школань ветеце «А» классо… Озавтызь «камчаткасо», Мещеряков Миша марто, конанень топодсть те шкас кеветее иеть. Кода меремс, «сырель». Сон мельце класстнэсэ тонавлесь кавтонь-кавтонь иеть. Таргиль цигаркадо кидеяк апак пеле…
Миша кокадизе Киятань човоньга, колейстэ пеедезь чуро тюжа пейсэнзэ лекстясь цёрыненть чамас чапамо качамонь чинесэ ды марямга кевкстизе: - Списывать давать будешь?
Кията апак тандадо мерсь: - Ули мелеть, сестэ ванкшнок тонсь тетрадказом. Монень а жаль…
Пель иень ютазь велинестэ сазь цёрынесь кармась сехте парсте тонавтницятнень ютксо. Савсь тензэ сюлмамс кирьгазонзо галстуккак. Васня сон сакшнось школав галстуктомо. Ды Раиса Михайловна кевкстизе курок: - Тон мекс галстуктомо якат школав? – Кията мерьсь: - Минек велинесэ пионерт, келя, арасельть… - Классонь ветиесь мерсь: - Ванды сак галстуксо.- Истя Кията «теевсь» пионерэкс.
Тонавлесь Кията шождасто. Весе предметнэнь коряс. Ансяк вейкесь тензэ кодаяк парсте эзь саеве: морамонь уроктнэ… Морамо а маштыль… Мезе теят…
Весть, те ульнесь котоце классо, мольсь морамонь урок. Тонавтыцясь, колонькемень иесэ эчке-куяв цёрась пианинанть экшсэ озадо вачкоесь пианинань лазнэтнень ланга ды кевстнесь, мень те нота…. Тейтернетне, кода актонь залсонть пачк озадольть икелць рядсонть, цёрынетне – удалост. Нама, аламодо балвасть, леднесть порнезь конёвнэсэ, эзть кунсоло пек, мезде кортась тонавтыцясь, мик эзть маряяк сонзэ. Тонань кежензэ састь лангозост. Редизе, кода Кията ледсь. Тонавтыцясь стясь: - Кияткин, стяка! – Цёрынесь апак учонь меремадонть соркстась ды стясь. – Кияткин, те мень нота?!! – тонавтыцясь, теньк-теньк, вачкоесь сурсонзо пианинань вейке раужо лазнэнть ланга…. Тейтернетне муст-муст пейдезевсть, сынь содыльть, Кията кодаткак нотат а содыль. Сон эзь тонавле музыкас тонавтома школасо. Кармасть тензэ эрьва ёндо салавине тошкамо-лездамо: - Си.. моль, си … бе моль…
Киятанень парсте эзь маряво, мезе тензэ тошкасть тейтернетне. Ансяк сон чарькодсь, мезе – а мезе эряви ёвтамс. Тонавтыцянть, неяви, кежензэ секень вант ва чадозь чадомо кармить… Кията домкасто лекстясь, арсезевсь, ды, виев вайгельсэ, седе прасте марязо морамос тонавтыцясь, мерьсь: - Те – «си ДЭ моль»!!!
Классось зэрневтевсь виев ракамодо!
Тонавтыцянть сельмензэ теевсть полгарят… Чамаванзо тусть якстере петнат. Кургозо автевсь. Суронзо кедьсэнзэ келейстэ тетькевсть. Сон венстизе кедензэ икелев. Чийсь Киятанень. Эчке понав сурсонзо сон каподизе Киятань сиведе, ветизе кенкшентень, лавтовсонзо панжизе кенкшенть ды мезе виезэ тёхмадизе Киятань кудыкелев: - Монь урокс ней сак ансяк директоронть марто!!!
Классось општ мерьсь…. Директорось ломанесь пек пароль, ансяк эйстэдензэ весе пек пелильть…
Киятанень ульнесь пек визькс… Сонзэ тунь арасель мелезэ кежиявтомс морамос тонавтыцянть. Сонензэ алкукс марявсь: «си ДЭ моль» тензэ тошкасть, аволь «си бе моль»….
Неть лецтнематне састь превезэм, зярдо тевконёвонь паргостонть понгсь тень кедезэм кавксо классонь прядомадо «свидетельствась». Морамо предметэнть каршо ашти тосо – 5… Мекс 5? Теде, улема, карми башка ёвтнемине…

***

Рузтнэнь ды эрзятнень прянь ветямо коест а вейкетть…

Эрямось моли… Эрзянь велетне каладыть… Эрзятне вачодо куломадо тукшныть эрямо ошов. Кадыть эрзятне эсь калмазырест, кадыть эрзятне эсь кезэрень кудо юртост, кадыть эрзянь койтнень, стувтыть тиринь эрзянь келенть, яжить келест ней рузокс кортамосо…
Кие - мелень трокст ды каршо, кие – паро мельсэ, тонадокшныть сынь ошонь од койтненень, косо пек сеедьстэ видекс маряви рузонь валмеревксэсь: -«Ломанесь лия ломанентень вергиз»… Ошонь эрицятне аволь вейкетьстэ вастокшныть сазь эрзятнень. Улить паро мельсэ вастомат, вастневить кеж мартотнеяк, келя, «понаехала тут всякая «мордва»… Парсте содасызь нетне, кода а вечкеви эрзятненень «мордва» травамка валось…
Педё Паняненьгак савсь неть стака иетнестэ миемензэ эсь кудонзо ды, тейтерензэ-содамонзо тердемаст коряс, савсь самс эрямо ошов. Иензэ атянтень топодсть коткемень котово, седе тов пиреськак а соксеви, а чувнови… Икелепелень эрзянь кеме шумбрачись аламонь-аламонь эйсэнзэ солась. Колхозонь пенсиясь эрямос а сатыль. Анюка низэяк умок сэредьсь, пильгевиензэ маштсть, якиль ансяк кудова, кардазовгак а лисевиль.
Ламо иень перть таштазь ярмактнэнь кис, ды кудонть миеманзо кис саезтнень кис, рамасть вейке нупальсэ квартирыне ламо верьксэв кудосо, васенце эрямверькссэнть. Меремс видьстэ, тейтересь-содамоськак лездасть ярмаксо аламодо. Лиякс те квартирынесь а рамаволь…
Полавтовсь эрямост Педётнень… А скал мельга якамс, а ведь ушосто кандомс, а пенгть анокстамс, а каштом уштомс… Мень теть а паро эрямо?!...
Ялатеке Паня атянть оймезэ тесэ а сэтьмель… Весемезэ паро, лангс ванозь… Ансяк ломантне та-кодат лият… Нама, ютксост паро ломантькак улить. Ды таго-мекс аволь пек паротне пек сеедьстэ вастовкшныть.
Паня атясь сась ошов аволь чаво кедть. Ули ташто «Жигули»зэ. Вана эйсэнзэ витнезь-петнезь ютавтыяк атясь неень эрямонь ютко шканзо. Ней ломантнень машинаст ламот. Лиясто мик кавтонь-кавтонь! Ды кодат мазыйть, виевть! Паня атянь «Жигули»сь вакссост тюжа унжинекс неяви… Ансяк, Паня атянть сельмензэ а сявадыть ломанень машинатнень лангс. Эрьвась эри кода машты, мезес ярмаконзо сатыть, сень лангсо ардтнияк…
Апарось вана мейсэ. Машинатнеде зняро, мик а козонь кудонть вакссо ней сынст лоткавтнемс-аравтомс. Паня атя мусь ве ёно а покш таркине, тоско кирдияк эсь «Жигули»нзэ.
Таго вана сась од телесь. Сон тедиде ловонть коряс пек сюпав. Правты ды правты. Ансяк кенерть ловонть урядамонзо. Паня атя эрьва валске кшнынь келей коймесэ уряды «Жигули»нзэ аштема тарканть. Атясь мусь важодема тарка, ошонть тона песэ вансты вень перть эйдень кужине. Сави тензэ ардтнемс тов эсь машинасонть. Лиякс а ён, васоло.
Велявтсь весть Паня атя важодемастонзо. Ваны – ловсто урядазь таркасонзо аравтозь омбо масторсо теезь машина. Вакссонзо кияк арасель. Мезть тейнемс? Зярс учось-тейсь атясь, кавксть-колмксть бибикстась… Ялатеке кияк машинанть вакс эзь са…
- «Паро эно…», - сась мельс Паня атя. – «Паряк, шкань ютазь сы, ды чамдасы аштема тарканть?»- Ливтизе «Жигули»нзэ кудонть кардайстэнть ки лангов. Кадызе тоско. Ютась чи. Ломанень машинась чоп аштесь тоско, Панянь кедьсэ урядазь таркасонть. Сась ве. Панянь мелезэ колавсь.
- «Вантая! Урядынь, урядынь ловонть… Ды на вана теть! Мелем апак кевкстне, саизь ды аравтызь эсь машинаст! Торлаяк визьксэзэ ломаненть арась…»
Паня атясь ломанесь чевте седей, стякодо лия ломань лангс а кежиявкшны. Таго сась мельс: - «Паряк, ломанентень пек а ютколь, ковгак, улема, тусь эрявикс тевензэ кувалма…»
Истя ютасть колмо веть. Машинась яла аштиль Панянь таркасонть.
Окойники, Паня атянть оймень кирдемазо маштсь. Сайсь сон ручка, конёв панкс ды сёрмадсь: - «Уважаемый! Место чистил я. Поставь машину другой место». Пштедизе конёвонть машинанть вальмас. Эсензэ «Жигули»нзэ аравтызе та-кода лома машинанть вакссо, неяволь, кие сёрмадыцясь, таркань «азорось», теке марто се ломанень машинаськак шождасто лисевель урядазь таркастонзо… Тедеяк паро мельсэ мелявтсь-арсесь Паня атя…
Ютась ве… Валске Паня атя лиссь, таго течи тензэ ардомка важодема таркав. Ваны, машинань кирдема тарказо – чаво! Кенярдозевсь: - «Ванока! А стяко сёрмадынь! Чарькодсь паро ломанесь… Чамдызе таркам… Эряволь сеск сёрмадомс…»
Паро мельсэ мольсь Паня атя «Жигули»нзэ ваксс.
Панжизе. Озась ветицянть таркас. Кепединзэ сельмензэ… Сляниканть тона ёно ульнесь педявтозь сонсензэ конёв панкскесь. Панянь сёрмадовксонзо трокст куя, раужо, тешксэ чирьстэ неявсь од сёрмадовкс: «МУДАК!»… Конёвось педявтозель покш пиже-ожо аксоркссо, кона сравтневезь а мазыйстэ чудезевсь сляникаванть…
- "Оно кода... Я-а, эно, лисни, рузтнэнь прянь ветямо коесь пек яви эрзяньсестэнть... - укстась стакасто атясь.

***

 

Нармушка авакшонь ёжо…

Псидеяк пси чи…
Покшонь покш ошонь куншка…
Асфальтсо вельтязь ошонь келей кись теке пси пачалго томба лангсо…
Колмо рисьмесэ апак лотксе кеверить урнозь-ирнэзь ардымтне-машинатне…

Кудо озяз авакшось левксэнзэ марто ливтясть ошонь келей кинть трокска…
Левксэсь ливтясь лавшинестэ, алга-алга…
Сэльшка эзь ливтяво кинть трокска, валгсь витьстэ кинть лангс…
Вансь каршонзо ардыця качамов ардымтнень лангс…
Авакшось сеск валгсь ваксозонзо…

Вейке машинась ювк тейсь ды ютызе озяз левкскенть вакска…
Авакшось либордозь кепететьсь кинть вельксэс…
Омбоце ардымесь ювк тейсь ды ютась озязкенть вакска…
Авакшось талакалезь ливтнесь левксэнзэ велькса…
Колмоце стака дырныгаесь, мезеяк апак нее, ютась витьстэ се таркаванть, косо озадоль озяз левкскесь…
Пси асфальтонть лангс кадовсь ансяк начко верь петнявкске ды толгинень тапавкске…
Озяз авакшось эрьва машинанть мельга валгокшнось толга тапавкскенть ваксс ды талнозь-чоледезь тердсь толгинень верь тапавкскенть ливтямо тов, косо кассть тусто куракшт…
Истя авакшось ливтнесь суньдерьгадомас…

***







©2015 arhivinfo.ru Все права принадлежат авторам размещенных материалов.