 |
|
Иля симне, ялгай, а ванькс лисьмапрясто
Иля симне, ялгай, а ванькс лисьмапрясто,
Иля корштне ведьте варакань лопасто,
Иля корштне ведьте варакань лопасто.
Эйсэст ведесь сэпей, седей сэви, кери,
Пицезь ойминесэм кисэть мелявкс эри,
Пицезь ойминесэм кисэть мелявкс эри.
Вай, цёра, цёрыне,
Од цёра, парыне…
Кодан тензэ коцтке, панар сустан, викшнян,
Кодан тензэ коцтке, панар сустан, викшнян.
Тензэ, киде содан, кинь оймесэм кирдян
Тензэ, киде содан, кинь оймесэм кирдян…
***
2014 ие.
Чумонь марямо
Мон чуман се ломаненть икеле,
Кинень эзинь венстя ялгакс кедь,
Кинь эйстэ туинь васолонь пелев,
Апак кая тензэ симемс ведь,
Нолдынк чумом, чевте седей ломанть,
Кинь лангс, ульнесь, кирдекшнынь мон кежть…
Мейсь кадыя вейке тейтерь-аванть,
Седеензэ кадозь апак эждть?
Оргодинь ваксстонзо капшазь, чиезь,
Истя лиссь... Ды лиякс кодаяк…
Виськсчамась разди, эри оймесэм,
Ды лазы седеем сон нейгак…
***
Валскень мельть-алтамот
Валскеть улезэ валдо- валдыне,
Чайведеть улезэ тантей-ламбамне,
Менелесь валдосо пейдевель,
Чипаесь лембесэ вельтневель,
Чинь чоп оймесэть
Парось эльневель!
***
Ки сась?
(Вармань тошкавкс… )
Ней тонь кувать а нетян,
Васов-васов туить,
Мелезэть мон а летян,
Оймить...
Стувтыть...
Кельмить...
Кадовсть валдо ледстнемат,
Сынь тонолнэкс липнить,
Сынь ней эйсэм а пицить,
Кельмезь…
Оймем…
Эждить...
Палыця теште пракшнось,
Летьке тикшень росас,
Варминесь тошказь кевкстнесь:
- Ки сась?...
- Ки сась?…
- Ки сась?...
***
Прянь чаравты кайгине
Озась нармунь, нармунь озась чувто прянтень,
Чизэ озась, састо ландясь паксянть пес,
Монень вечкевсь, седейс совась сэредькс тантей,
Вечкевсь цёра, кона седи кайгинес.
Монень вечкевсь прянь чаравты седямозо,
Кона терди, терди эйсэм вирь чирев,
Тундонь вирев, косо учось эйсэм тосо
Кандынь тензэ, кандынь тензэ седеем.
Молинь тензэ, Ковонь Пазонь мон тейтерекс,
Молинь истя, кода тундось теленть пачк,
А содылинь, те седямось истя гайнесь
Аволь монень, гайнесь лия тейтернень.
Озась нармунь, нармунь озась чувто прянтень,
Чизэ озась, састо ландясь паксянть пес,
Монень вечкевсь, седейс совась сэредькс тантей,
Вечкевсь цёра, кона седи кайгинес.
***
Сёксь
Начко вальмат, кольги менель,
Сёксесь аварди…
Вармась пувси начко штеметь,
Лопат тардевти…
Паксят – штапот, виресь – шрапо,
Кувсить чувтотне…
Сляникаванть апак лотксе
Чудить нулкотне…
Лавтовозот педясь кизэсь,
Оласть черь петне…
Турват палсемадо сизесть,
Ютасть сеть читне…
***
Мон ярдо-бути арсинь
(В. Д. Фёдоровонь «А я когда-то думал» валморонзо эрзянь кельс ютавтовкс)
Мон зярдо-бути арсинь,
Шержев цёрат
А вечкить,
А тошнакалить,,
А янксить.
Мон зярдо-бути арсинь,
Шержев цёрат
А варштныть
Аваломань-тейтерь лангс.
Шержевтнень, келя верест
Скимезь ведекс
Сэтьме лейнекс,
Ютазь мелекс,
Чуди састо,
Апак капша-
Сезнень панкст…
А лондавлесы веднесь,
Лей чиретнень…
Вант ва!
Шержев леенть -
Корозо, содак, секе,
Виезэ ине сэрень,
Секе чудильмась!
Кадык вандолды прясо
Шерже. Ойме виесь секе,
Эйсэнзэ - вечкема!
***
Вирень инзейне
(алтави вейке мазый эрзянь авантень)
Мейсь, вирень инзейне, човордык седеем?
Мейсь талакавтык оймем?
Вирень кужосонть, якстерестэ кенерезь,
Кольнят-налксят икелем.
Вакскат а ютават, чиезь а ношкстават,
Танстеть чаракавты прям,
Венстяса кедем, тонсь якстере байгинекс,
Паморькскекс прат кедезэм…
***
Сёксень сырне
Вирьсэнть – кашторкст, сёксесь сась.
Тумо прясто сэря прась.
Шанжав коцтсонть цитнить байгеть,
Сэнь менельсэнть – каргонь вайгельть.
Вана ожолды килей,
Палы толсо од чевгель…
Тумось правты стака сэрят,
- Шумбрат, ялгам! Кода эрят?
Каршо марявсь: - Ат-ат-та!!
Кары ундо шекшата.
Лопа алдо пангт ваныть,
Вакскаст стяко мекс ютыть?
Саить кептерь? Пештьсэ пештик,
Тантей торланть кельсэть лепштик.
Сёксень чинеть… Сёксень танстть…
Седе паро чить - арасть!
Лембе, маней, валдо чись…
Модась – якшамот учи…
Вирьсэнть – кашторкст, сёксесь сась,
Сырнень палясо оршазь.
***
2014 ие.
Кавтолдомат
- Эрян? Эли ансяк - улян?-
Кевкстнян эсь прям, кевкстнян...
- Моран? Эли ансяк ранган?-
Арсян теде... Арсян...
- Ломанть ветян? Мельгаст молян? -
Пивтян... Тей-тов эвтян...
- Неян? Эли ансяк - ванан?-
Аздан теде... Аздан...
Чопода весэнть а удан.
Арсян... Майсян... Кувсян...
- Чарькодян мезеяк? -Вечкан?-
Аздан теде... Аздан!
Менельстэнть палозь теште прась,
Удомам зярс арась, арась...
***
Эрзявантень
Мон мораса се Эрзяванть,
Кона эйде шачты,
Лемдясы ванькс эрзянь лемсэ,
Трясы ды кастасы:
- Эрзянь раськень – вечкезь,
- Ютазь шкадонть – содазь,
- Эрзянь оймень – кастозь,
- Эрзя лементь – ванстозь…
Сон сестэ а ёми,
Минек кезэрь раськесь,
Теке вирь одкстоми,
Венть мельга – сы валскесь!
Мон мораса се Эрзяванть,
Кона эйде шачты,
Лемдясы ванькс эрзянь лемсэ
Ды Эрзякс кастасы…
***
Aваломань
(Муса Джалилень валморонь ютавтовкс)
Сурпрясонзо сезизе седеем сон,
Пургсизе куловты ведьсэ.
Пеедемасонзо копачась сонсь,
А стардсак а валсо, а сельмсэ.
Ичинзэ валдыне мелем рудайс,
Пильгалонзо – монь каштанксом.
Коронзо невтизе, мерят, сон – Паз,
Коданя арсизе – тейсь сон.
Улезэ истя, каштмолян мон.
Чамам ваявтса мештьсэнзэ.
Вешсь сон майсемат? Пельксты ней сонсь
Эсь визьксэнзэ марто, а мартом…
***
Чаво мельсэ ков
Ковось ваны ашо сельмсэ
Эев вальманть пачк,
Теке кевкстни чаво мельсэ:
Кинь сельмензэ начкт?
Кинь течи тарди оймезэ,
Кие вачо мадсь?
Кинь кудов эзь са мирдезэ,
Косо эйде шачсь?
Кие вень перть майсезь майси,
Кувси сэредезь?
Кие ава псистэ палси
Теке иредезь?
Ковось ваны ашо сельмсэ,
Уи сувонть пачк…
Сон содасы, чаво мельсэсь:
Мекс эрямось чачк…
Ськамозо нурьги менельсэнть,
Ськамозо соды
Кие уды пек тантейстэ,
Кие а уды…
***
Сёксень паламо
Тейтересь пильгесурнэс стясь
Ды казинзе монень турванзо…
Палсемензэ мелем арась…
Сёкень кельметне прасть а шкасто...
Сельведьсэ пештявкшность сельмензэ,
Сёксень экшесь кельмевтсь эйсэст...
Потмура чись прядызе пензэ…
Мик мазый онтнэнь ули пест...
Тейтересь пильгесурнэс стясь
Ды казинзе монень турванзо…
Пизёлонь сэпе тансть марявсь,
Зярдо палсинь сынст састо-састо...
***